Skip to content Skip to left sidebar Skip to footer

Betawi Punya Cerita

Biar miskin tapi berkah

Dulu biar kata kita ama duit rada susah tapi ama nyeng namanya ama makan mah pada ketemu,pengen lauk tinggal mancing, ngejabrug ,nganco,nanggok atawa neger ikan di mana aja belatak,berasa bangat berkahnya

Kaga punya beras tinggal ngiles,numbuk padi nyeng kita simpen di pangkeng ,di gebog atawa nyeng padinya rada banyakan di simpen di lumbung,makan beras baru tibang ama lauk eceng sawah aja ge rasanya berasa nikmat.

Pengen nyayur lah tinggal ngeramban di kebon mao pengen nyayur apa ge ada daon singkong di lodeh, nyayur kundur,nyayur timbul apa lagi nyeng namanya sayur asem tinggal nutur di kebon bahan nya bejibun.

Lah pengen ngelalab daon apa aja juga dulu mah enak daon singkong,daon bluntas ,kemangi,kenikir, jonge,ketepengan,lalab gori ,lalab pete jengkol muda,pete,terong,daon mede,daon putat,daon gandaria,daon salam,daon jengkol muda ampe daon nangka muda ge dulu mah enak beud buat di lalab dan banyak asal mao ngeramban nya aja,kaga punya kebon lah kebon sapa ke kita rambanin dulu mah orang kaga ada nyeng marah.

Kalo enyak abis ngewatun buangin rumput di puun padi nyeng baru mangkat gede biasanya entuh pulangnya pada ngandut daon eceng sawah, makan kaga ada lauknya pake eceng goreng aja ama sambel terasi udah sumbrah beud..eceng rasanya lebih enak dari kangkung dan lebih gurih dan lebih lembut daon nya,tapi ampas nya mah sama kalo kuar tetep pada manting mulur..kembang eceng enak bangat buat tumis ama ikan teri gurihnya bikin makan jadi nambah.

Dulu mah nyeng namanya gaang ama balang aja bisa di bikin buat lauk ,entuh balang padi nyeng ijo dulu mah umres pada makanin daon padi muda ,nah kita resep nangkepin entuh balang kita tegrepin atu-atu lah kaga berasa ampe sesidikan kita bakar ataw di goreng entuh balang sama gurihnya..lah makan goreng balang ama campur garem dan bawang goreng ge udah uplek beud apalagi makan nya pas lagi ujan-ujan.

Lah sekarang mah kalo kaga punya duit rada susah, kaga bisa beli lauk,nyari ikan susah,nyari eceng udah kaga ada ..ngeramban udah kaga ada kebon nya,lah bisanya paling tibang celam doang ngiat orang makan pake lauk kita kaga…pertanda keberkahan atu-atu di cabut ama nyeng punya lantaran orang karang mah rada ogah ama besyukur kali ya….

Betawi ,24 Juni 2020
Bang ILok