Skip to content Skip to left sidebar Skip to footer

Nutur buah

Saban pagi dulu mah kita bedulu-duluan bangun ama ayam,apalagi kalo lagi musim buah entuh umun-umun udah maen di kebon nutur dukuh nyeng pada murag,merutug di orag kampret,lah kalo kesiangan dikit abis udah entuh buah dukuh dipatokin ama ayam.
Entuh dukuh pada ngambak di tanah resep beud kita mungutin nya ,kaga usah beli dulu mah asal mao aja nuturnya, mao pegi sekola kita mampir dulu di kebon orang nutur manggis,bacang,bembem nyeng pada jatoh di kebon,lah dulu mah kita sekola kaga pake patu ge jadi alias nyeker entuh tanah debel di kebon kaga masalah tinggal kita ke kosod di rumput ge kaki udah bersih lagi.
Dulu nyeng namanya kampung kita pan sorganya buah,mo buah apaan ge ada dari nyeng manis,asem ampe pait kaya buah gernuk ge ada,jadi dulu mah kalo kita mo makan buah kaga pake beli, apalagi kalo lagi musim rambutan dateng entuh puun rambutan selebar kebon ada,ampir setiap rumah ada pu-un nya pengen makan tinggal ngeronjat kaga usah pake naek,lah orang buahnya pada manting nyengser ke tanah saking keberatan ama buah,ampe kita ngerasain kebanyakan makan rambutan entuh mulut kita pada manting boes.
Uman pu-un salak doang bocah nyeng rada iseng, kata baba katanya pu-un salak sokanan di jaga ama ula iterm ,entuh pu-un salak dulu mah di jadiin batian kebon,biar orang rada ribed masuk sembarangan ke kebon orang,tapi nyeng namanya bocah mah terkadang kaga ada takutnya entuh puun salak orang abis daon mudanya dibetotin buat di makn embutnya ama salak nyeng masing pada petil ge abis dipotesin.
Duren nyeng kata orang rada mahal harganya dulu mah kita ampe mabok makan duren jatoan, dulu kalo baba kita lagi asyik ngopi sore di bale jogan rumah entuh duren pada manting gelinding nyamperin, lah gimana kaga? entuh pu-un duren tumbuh nya di pas tebingan,rumah kita ada di bawah lah puguh ah pas entuh duren nyeng bebuah cabangnya arah rumah kita jatohnya pada gelinding ke latar kita, biar kata bukan pu-un duren kita kalo entuh buahnya jatoh di lataran kita lah udah sah jadi milik kita ..kita belah ge kaga ada nyeng marah.
Resep beud dah kalo inget masa entuh mah pala kita ampe gindil kena embun nyeng pada nemplok di pu-un pisang saking resep nya nutur buah nyeng pada jatoh,entuh muka pada putih kena tai Lege ge kaga ngaruh pisan entuh bocah tetep aja asyik milin capi nyeng pada ngambak di tanah,bagen masing pagi ge entuh bocah asyik aja pada geragotin dondong mateng yang pada jatoh .
Source : Bang ILok